نشر محمد نجا، عبر صفحته الشخصية على الفيسبوك قصة غناء العندليب الاسمر في فرح ابنة عسكري المرور.

العندليب الاسمر عبد الحليم حافظ كان ماشي بالعربية بتاعتة وبجوارة، الصحفي فؤاد معوض

صديق حليم.

قابلتهم اشارة مرور فطبيعي لازم يوقف لحد

ما الاشارة تفتح

عسكري المرور شاف عبد الحليم حافظ وقرب

عليه وقاله

بنتي فرحها يوم الخميس الجاي ممكن تيجي الفرح وتجبر بخاطرها وخاطري وده جميل مش هنساه ليك العمر كله

العندليب قاله ولا جميل ولا حاجة اكتب العنوان

يافؤاد

فؤاد بيقول جبت ورقة وقلم وكتبت العنوان علشان افتكرت ان حليم

اتحرج من عسكري المرور واتكسف يقوله لا

علشان نعدي وخلاص موقف وعدى

كتبت العنوان وحطيتة على طابلوه العربيه ونسيت الموضوع

لقيت حليم بيكلمني يوم الخميس وبيقولي اجهز علشان اعدي عليك ونروح فرح بنت عم سيد

قاله عم سيد مين ياحليم ، حليم قاله عم سيد عسكري المرور اللي قابلنا فى الاشارة .

الصحفي بيقول والله انا نسيت الموقف بس لما حليم فكرني بأني انا اللي كتبت العنوان افتكرت وقلتله العنوان فى ورقة عندك على الطابلوه

بس ده العنوان ده فى منطقة شعبية ياحليم اسمها درب البرابرة

العندليب قاله ولو فى المريخ هروح برضوا انا

وعدت الراجل وخلاص اجهز وانا هعدي عليك .

وفعلا عدي حليم بالعربية خدني واحنا ماشين فى الطريق حليم، شاف محل مجوهرات ركن سيارتة ونزل ودخل

محل المجوهرات ده ولقيته جايب هدية

دهب ملفوفة لفة شيك جدا، وروحنا على العنوان المكتوب فى الورقة

اللي عارف منطقة درب البرابرة دي الحواري بتاعتها ضيقة جدا وعربية العندليب مينفعش تدخل جوه المنطقة، ركنا العربية بتاعة حليم ودخلنا مشي على رجلينا ونسال لحد ما وصلنا للبيت اللي فيه الفرح.

الناس شافت حليم من هنا وضرب النار والزغاريط والاحتفالات علشان عبد الحليم حافظ.

استقبلنا عم سيد وطلعنا البيت وحليم دخل للعروسة وقدم الهدية اللي جايبها وبارك للعروسة، وكملنا طلوع السلم اتاري ان الفرح معمول فوق سطوح البيت

كل ده والابتسامة مفارقتش عبد الحليم كان فى قمة سعادتة.

طلعنا السطوح ولقينا بقا المعازيم والناس ايه زحام شديد،وكان فى فرقة بسيطة كده زي تخت عربي بالالات شرقية.

عبد الحليم سلم على الفرقة البسيطة دي وقالهم

ها يا اساتذة حافظين حاجة ليا

قالوا طبعا يا استاذ كل اغانيك حافظنها

قالهم طب يالا، اول مرة تحب ياقلبي

وغني عبد الحليم ٤اغاني فوق سطوح منزل عم سيد عسكري المرور اللي اصبح بعد كده صديق حليم ويدخل اي حفلة ببلاش، ويقعد فى الصف الاول

كمان.

السؤال هنا بقى فى جبر للخواطر كده فى الدنيا؟

ربنا يرحمه ويتجاوز عن سيئاته ويغفرله ويسكنه فسيح جناته